براسانی دیوانجاه
این وبلاگ هیچ گونه گرایش سیاسی نداشته و یک مکان آزاد می باشد (شعر ، داستان ، عکس ، مطلب و مقاله (بلوچی و فارسی)) . 
نويسندگان

اگاں ما بلوچْ راج، وتی راجدپترءَ بچارإیں و وتی پیرینانی زندءِ بارهءَ پٹ و لوٹ بکن إیں؛ گڑا گندإیں که مئی راجدپتر سک شاندار و ترپناک إنت و اگاں چه إے دگه راجاں دیماتر نه إنت؛ بلئے اینچو باز پشتءَ هں نه إنت که ما لجیگ و شرمندگ ببئیں.

گیش چه هزار و چارصد سال إنت که ماں إیرانءَ اسلامءِ بیرک چنڈگءَ إنت. مفسراں، محدثاں، فقیهاں، نیکراهی زانتکاراں، درّیس و پرّیس کنوکان و جهان اسلامءِ گیشتریں زانتکاراں چه إے ملکءَ سرچست کتگ. اگاں إیران، زانت و ادبءِ بُنجاه گوشگ بوتگ گڑا بلوچانءَ ماں إے ملکءَپه علم و ادبءِ دیمرویءَ مزنیں بهر و دستے بوتگ.

دپترزانت و پولکاراں ماں وتی کتاباں  نبشتگ وهدے که اسلامءِ لشکر چه حجاز و عربستانءَ په إیرانءِ إیرجیگ کنگءَ یهت یکے چه ساسانی حکومتءِ مستریں سرداراں، بلوچے أت که آ واجهءِ نام «سیاه سوار» أت و إے واجه یک سرمچار و بهادریں سردارے بوتگ.

وهدے که مئی إے دلیر و شیرمزاریں سردار، چه وتی پهته إی و هُژّاریءِ سَوَبءَ سرپدبوت که اسلام هما بے مٹ و ‌بے دروریں دین إنت که چه اللهءِ نیمگءَ دیم دیگ بوتگ که انسانءَ ماں دوئیں جهانءَ سوبین و کامیاب کنت، گڑا واجهءَ گوں وتی لشکرءَ، اسلام یارگءَ دیرنکت.گوں سیاه سوارءِ اسلام آرگءَ مزنیں بهرے چه ایرانءِ راجءَ اسلامءِ دینءَ مَنّ إت؛ چیا که آیاں چه زردشتی دینءَ سیروارتگ أت و چه آ دینءِ پادشاهاں، بزرگان و مذهبی سروکان و سپاهیگاں سک باز ناشری و زوران سری دیستگ أت.حضرت سیاه سوار- رحمه الله - یکے چه تابعیان إنت که پیش چه إے دگه راجاں آئیءَ اسلام قبول کت؛ پمشکا یک بلوچی شاعرےءَ ماں وتی یک پربندے چوش گوشتگ:

بلوچاں  چه هر قوم  دیماترأنت/ په صبر و  په  اوپارهم  گیشترأنت


بلوچاں پرچا اسلام قبول کت؟

إے جستءِ پسوءَ بایدإنت که بگوش إیں اسلام، حیا و عزت، مڑاداری، مهمان جلی، وفاداری، قول و قرار و مردانگیءِ دین إنت و إے صفات ماں بلوچاں، چه پیشءَ هست إتنت، بلوچان و اسلامءِ طبع یکے أت؛ پمشکا آیاں مسلمان بوت أنت واسلام، آیانی شرف و عزت بکشات.

ماں بلوچی دُوْد و ربیدگاں هچ چیزے نه إنت که اسلامءِ خلافءَ ببیت و اسلامءِ دیمءَ بأوشتیت؛ پمشکا بلوچی دود وربیدگ گوں اسلامءَ یک أنت و اگاں لهتے مردم، چیزے نوکیں هیل و عادت زرتگ، إے هیل و ‌عادت نئے بلوچ راجئیگ أنت و نئے اسلامئے، گڑا باید إے پیمیں وتگریں هیل و عادتاں یلو دیگ ببنت چیا که إشاں انسانءِ دین و دنیاءَ تاوان دینت.

ما منتوارإیں چه پهکیں زانتکار و قلمکاراں که په بلوچی زبانءِبودناکیءَ تُکش أنت و بلوچیءِ هُشکاوگیں کُوچِّگءَ میزرین أنت و په وتی زبانءِ زندگ دارگءَ، انٹرنٹءِ تها بازیں سایت و وبتاک پیم کن أنت. الله اشانءَ خیر بدأنت.

گیشتر ما وتی درملکی بلوچانی منتءَ شرتر ادا کن إیں که آیاں په زبانءِ دود و ربیدگءِ دیمرویءَ جهد کتگ، روتاک و مهتاک، وهدتاک و کتاب، چاپ و شنگ کتگ. ماں إے پڑءَ مئی رودراتکی بلوچستانءِ برات وگهار گیشتر دادانی لایق أنت که آیانی بے دروریں جهداں بلوچی زبانءَ دیمءَ برتگ. بلئے ادءَ یک هردیں گله إے ما را چه وتی هما بلوچاں هست إیں که آیانی باور همش إنت که بلوچانی پدمنتگیءِ سوب اسلام إنت و وتی إے باورءَ په ترندی و بے دلیل پیش کن أنت.

مڑاداریں وانوکاں! ماں دنیاءَ تهنا ما بلوچ پدمنتگ نه إیں. دگه سدانی راج هں هست إنت که آیاں مسلمان نه أنت بلئے پدءَ هں پد منتگ أنت گڑا شما آیانی باروءَ چے گوش إت؟ مئی پدمنتگیءِ سوب بےتعلیمی و جهد و تلاش نکنگ إنت، وت ماں وتءَ جنگ و جیڑه، برات کشی، یکادگرءَ إیرجنگ و مانْ نیارگ، درآمدْدوستی و دوست ودژمنءِ پجاه نیارگ إنت.
اگاں ماشما اسلامءَ یلو بکن إین و عیسائی ببئیں پدءَ هں غلامیءِ لوپ چه مئیگ و شمئی گٹءَ درنبیت.

شما بیاإت بچارإت اسلام مارا چه تاوانے داتگ په قولءِ شاعرے که گوشتگی:

اسلام به ذات خود ندارد هیچ عیبی / آنچه عیب است در مسلمانی ماست

مابلوچاں مسلمان إیں و په شریءَ هں زان إیں که اسلام، هم قومانءَ تایید کنت و هم زبانانءَ؛ بلئے همایانءَ گهتر قرار دنت که پرهیزگارتر ببنت.

مئی امیت و واهگ إنت که مئی پاکستانءِ عالم و زانتکاراں وتی ذمه داریءَ په
شری بمارأنت و بلوچی زبانءَ یک وسیله إے په دینءِ هزمتءَ قرار بدینت.

نبیسوک: مولوی محمد حنیف حسین زهی

[ یکشنبه ۱ آذر ۱۳٩٤ ] [ ۱۱:٠۳ ‎ب.ظ ] [ عادل قنبرزهی ]
.: Weblog Themes By Iran Skin :.

درباره وبلاگ

امکانات وب
قرآن آنلاین

,,

اسما خداوند متعال