براسانی دیوانجاه
این وبلاگ هیچ گونه گرایش سیاسی نداشته و یک مکان آزاد می باشد (شعر ، داستان ، عکس ، مطلب و مقاله (بلوچی و فارسی)) . 
نويسندگان

بے شک ایمانءِ بهتریں سرچمگ، پیغمبر وآئیءِ صحابیانی زندگی وتاریخ إنت.
صحابه تاریخءِ هما مزن مردان أنت که وهدے اسلامءِ دعوت په آیاں رس إت آیاں گوں جان ودلءَ قبولش کت وگوشتش: رَّبَّنَا إِنَّنَا سَمِعْنَا مُنَادِیًا یُنَادِی لِلإِیمَانِ أَنْ آمِنُواْ بِرَبِّکُمْ فَآمَنَّا.

آیاں گوں وتی زحمت و خدمتاں په اللهءِ دینءَ، وتی نام إش ماں تاریخءِ دپترءَ ثبت کت و په همیشه آیانی نام وتوار پشت کپت.

ماں إے نبشتانکءَ یک گُلے چه إے گلستانءَ که آ حضرت عمر فاروق إنت پیش کنگ بیت

واجهءِ نام و نسب

حضرت عمربن خطاب بن نفیل بن عبدالعزی عدوی وقرشی إنت و واجهءِ نسب ماں کعب بن لؤی ءَ گوں پیغمبرءِ نسبءَ هور بیت. واجهءِ لقب، فاروق إنت.

پیسر چه اسلام

کسانیءَ حضرت عمر وتی پت وناکوانی شپانک أت، رندءَ ماں ورنائیءَ گوں وتی براتءِ همکوپگیءَ په تجارتءَ شت وماں وتی سوداگری سفراں په شام ویمنءَ گوں إے دگه راجانی دود وربیدگءَ پجاروک بیت. وماں جاهلیتءَ قریشءِ سفیر أت و وهدےکه اسلام آتک آئیءِ وفا گوں قریشءَ سبب بیت که گوں اسلامءَ مخالفت بکنت همے پیمءَ انگتءَ آئیءَ اسلام ءِ بارهءَ باز سرپدی نیست أت؛ همے واستا آئی په کسانے که ایمانش آرتگ أت باز ترند سک أت.


اسلام آرگ

وهدے که اسلامءِ توار روچ په روچ ماں مکهءَ برزتر روان أت ومکهءِمشرکاں  دیت که هچ پیمءَ محمد چه وتی دعوتءَ دست بردار نه إنت، گڑا آیاں تصمیم گپت که واجه پیغمبرءَ چه بین ببرأنت، بلے هرکسءَ توان نیست أت که إے کارءَ بکنت، پمشکا پهکاں یک توار بوت أنت که عمر باید إے کارءَ بکنت، گڑا عمر تیار بیت که پیغمبرءَ چه بین ببارت، بلے الله تعالیءِ تقدیر دگه پیمے أت.

عمرءَ زهم زرت و دیم په ارقم بن أبی الأرقمءِ لوگءَ رهادگ بیت، اناگتءَ راهءِ تها گوں نعیم بن عبدالله ڈیکی وارت آئیءَ گوشت: هاں عمر! باریں کجا جهلادئے؟
عمرءَ پسّه دات که په محمدءِ کشگءَ رهادگوں، نعیمءَ گوشت: اوْ عمر! ترا گوں محمدءَ چکارإنت، برو وتی گهار و زاماتءَ بچار که آ مسلمان بوتگ أنت.

وهدے که عمرءَ إے خبر إشکت اجکّه بوت و په وتی گهارءِ لوگءِ نیمگءَ تچان بوت، بزان إے وهدی حضرت خباب، آئیءِ زامات و گهارءَ سورهءِ طهءَ درس دیگا أت، وهدے که آیاں عمرءِ پادءِ برمش إشکت، حضرت خباب إش چیر دات و وت یک گورے نشت أنت، عمرءَ بزاں آیانی توار إشکتگ أت، گوں هژم وغضبءَ لوگءَ مان بوت و گوشتی: شما گوں وت چے وانگءَ إتت؟ آیاں گوشت: هچی ما بس گوں وتءَ هبر کنگاإتیں. عمرءَگوشت: شما بے دین بوتگ إت؟آیان گوشت: اگاں حق غیر چه تئی دینءَ ببیت گڑا پدا هں ما را بی دین گوشئے؟
عمرءَ گوں إے خبرءِ إشکنگءَ وتی زاماتی ماں زمینءَ جت وآئیءِ سینگءِ سرا نشت و په آئیءِ جنگ و چوپگءَ لگّ إت، عمرءِ گهار په وتی لوگواجهءِ کمکءَ شت ولوٹتی که عمرءَ چه آئیءِ سرءَ دور بکنت که عمرءَ شهمات کت وچه آئیءِ دیمءَ خون رچگءَ لگ إت آئیءِ گهارءَ گوشت: اے خداءِ دژمن تو مارا په إشیءَ جنئے که یکیں خداءَ عبادت کنیں؟
هرکارے لوٹئے بکن که ما مسلمان بوتگ إیں. عمر گوں إے گپانی إشکنگءَ آرامتربیت و چه زاماتءِ سینگءَ پاد آتک وگوشتی: همے صحیفهءَ که شمائی وانگاإتت منی بدیت تا بوانانی، بلے گهارءَ نمنّ إت وگوشتی: تو پلیتئے باید غسل بکنئے. عمرءَ إے کار کت  وگهارءَ  سوره طه ءِ آیات آئیءِ دستءَ دات، سوره طهءِ وانگءَ مزنیں تأثیرے آئیءِ سرا هشت وتی گهاری گوشت: هما ذات که إے گپانی جتگ، بس عبادتءِ لایق إنت، منءَ محمدءِگورءَ ببر إت. عمر رسول اللهءِ گورءَ ماں أرقم بن أبی
الأرقمءِ لوگءَ شت و اسلامی آرت. گوں عمرءِ اسلام آرگءَ مسلمانانی حالت باز تغییر کت ومسلماناں توانت ماں مسجدالحرام، پهکانی دیمءَ نماز بوان أنت وعمرءَ گوشت: رند چه مروچی هچبر خداءَ چیرکانی عبادت نکنیں. عمرءَ گوں وتی إے توارءَ تاریخءِ سکوتی پروشت و آشیر مردءَ تهنا ابوجهل وابو لهب خطاب نکت أنت بلکیں آئیءِ مخاطب پهکیں زوراکاں ماں پهکیں زمانگان أنت.

هجرت

وهدے که پیغمبرءَ مسلمانانی په هجرتءَ دستور دات، مسلماناں رُمب رمبءَ چیرکانی هجرت إش کت، بلے عمر بے هچ بیمے په هجرتءَ آماده بوت و وتی زهمی لانکءَ جت زرت و ماں روشنیں روچءَ مسجد الحرامءَ آتک و رند چه طوافءَ  پهکیں کافرانی خطاب کت وگوشتی: شما پهکاں سهیگ ببئیت که من دیم په مدینهءَ روگایاں هرکس که لوٹیت چکانی چوره، جنی جنوزام وآئیءِ پت ومات پرسیگ ببنت  گڑا بیئیت ڈن چه شهرءَ گوں من دیم په دیم ببیت، بلے هچکسءَ إے جرأت نیست أت که گوں عمرءَ بمڑیت.

حضرت عمر وپیغمبرءِ وفات

وهدے که پیغمبر چه دنیا رخصت بیت، صحابه پهک حبران بوت أنت وجهان آیانی چمانی دیمءَ تهار بوت وگوں وت إش گوشت: کاش که پیسر چه إشیءَ ما بمرتین إیں، عمر هں ماں سکیں غم واندوهے تها أت وپیغمبرءِ دوستی، آئیءِ سرا غالب أت وپیغمبر وفاتی نمن إت، بلکیں زهمی دستءَ گپت ودیم په مردمانی کت وگوشتی:  پیغمبر وفات نبیتگ، بلکیں موسیءِ وڑءَ خداءِ نیمگءَ شتگ و پدا پچ تریت وهرکس که بگوشیت: پیغمبر وفات بوتگ. من آئیءِ سرا سنداں.

همے وهدءَ صدیق اکبر آتک ومردمانی دلگوشی وتی نیمگءَ کت وپرمائینتی: أے مردم! هرکسءَ که محمدی عبادت کتگ المءَ بزانت که واجه وفات بیتگ، وهرکسءَ که الله عبادت کتگ، گڑا الله زندگ إنت وهچبر نمریت. عمر گوں إے گپانی إشکنگءَ سارءَ آتک و زانتی که آئیءَ اشتباه پهمتگ ودلجم بوت که پدءَ وتی محبوبءَ دنیاءِ سرءَ نگندیت.

حضرت عمر ماں حضرت ابوبکرءِ‌ خلافتءَ

رند چه إشیءَ که حضرت ابوبکر په خلافتءَ گچین کنگ بیت، حضرت عمر آئیءِ باسک أت و گوں وتی شور و سر سوجاں په اسلام ومسلماناں خدمتی کت.

حضرت عمرءِ خلافت

وهدے که حضرت ابوبکرصدیقءَ معلوم بیت که آئیءِ وفات نزیک إنت، گوں
اصحابءِ شورءَحضرت عمر فاروقی  په خلافتءَ گچین کت، چه إے کارءَ بازیں مردمے گوشیگا دلگران أت وگوشت إش که حضرت عمر گرمْ مغز و جلالی مردے، بلے حضرت عمر رند چه حضرت ابوبکر صدیقءِ دفن کنگءَمسجدءَ آتک و وتی  روش ومنهجی په مردماں توضیح دات وپرمائینتی:  أے مردم!  لهتے چه شما چه منی  خلافتءَ دلگران إتت وشمارا إے بیم هست أت که عمر شمئے سرا سکی کنت، بلے إشیءَ بزان إت که منی سکی پیغمبر و ابوبکرءِ زمانگءَ بیتگ، پچے که پیغمبر رحمة للعالمین وابوبکر سکیں نرمْ دلے بیتگ، آیانی نرمی گوں منی سکیءَ یک معتدلیں حالتے پیداگ کتگ، بلے هنو منی سکی بس ظالمانی سرا إنت،  و من په مومناں چه آیانی  جرندءَ نرم تراں. رندا مسلماناں گوں عمرءَ بیعت کت و گوں آئیءَ دست إش دات.

فتوحات

حضرت عمرءَ ماں وتی خلافتءَ اسلامی حکومتی باز  دیما برت و دو مزنْ واکیں حکومت، إیران ورومی پروش دات، وپیغمبرءِ وعده په قیصر وکسریءِ گِرَگ، حضرت عمرءِ دستءَ ثابت بیت، وآئی اولی نفرے إنت که بیت المقدسی چه مسیحیانی دستءَ بے جنگ وهون ریچیءَ پچ گپت.

حضرت عمرءِ دورءَ اسلامی حکومت روچ په روچ پراهْ گورتر بیت، وماں آ زمانءَ حضرت عمرءَ چه مدینهءَ، گوں وتی سیاست وتدبیرءَ إے مزنیں حکومتی اداره کت.

وفات

حضرت عمرءَ تا ده سال مسلمانانی خلافتءِ پست و منصب زینت دار کت، شپ و روچ په مسلمانانی خدمتءَ اوشتاتگ أت  ویک دمانے  چه آیانی خدمتءَ غافل نبیت.

آسرا  حضرت عمر فاروق، رند چه دراجیں عمرے خدمت په اسلام و مسلماناں ماں مدینه منورهءَ، ابولؤلؤ مجوسیءِ دستءَ شهید کنگ بوت، وماں وتی دو دوست ومحبوبءِ کرءَدفن کنگ بیت.

ندکار: زبیر حسین زهی

سرچمگ: اسلامءِ توار

[ جمعه ٥ اردیبهشت ۱۳٩۳ ] [ ٦:۳۱ ‎ب.ظ ] [ عادل قنبرزهی ]
.: Weblog Themes By Iran Skin :.

درباره وبلاگ

امکانات وب
قرآن آنلاین

,,

اسما خداوند متعال