براسانی دیوانجاه
این وبلاگ هیچ گونه گرایش سیاسی نداشته و یک مکان آزاد می باشد (شعر ، داستان ، عکس ، مطلب و مقاله (بلوچی و فارسی)) . 
نويسندگان

براسانی دیوانجاه

 کنان حمد ءُ ثنا ربءِ جلیلءَ

که بی مَٹ اِنتءُ دَروَر په دلیلءَ

کنان من  اِی بیانءَ چه  کُرانءَ

په آوان که نه مَنّ اَنت سَکّ سَرانءَ

هُدا بَرهَکّ ءُ  یکتااِنت ءُ یَک اِنت

جهان گون هُکمی دائم جِکّءُسَکّ اِنت

نشان ءُ  کُدرتی بازاِنتءُ لَکّ اِنت

هُداوند هادی اِنتءُهُکمی هَکّ اِنت

هُداوند  وت  وَدی  کُت آزمانءَ

زمینءَ  آدمءَ  مه  یک  دَمانءَ

دُراهین دَلوتءُ گُوکءُ  پَسانءَ

هَمُک روچءُ زُمستانی  شپانءَ

پدا وَزبَت  کنان  پیگمبرءَ من

سَروگءُسرورءُرَهدَربرءَ من

دُروتان دیم دَیان په دِلبرءَ من

رسولُ اللهءُ  دُرّین رهبرءَ من

پدا مدحءَ  کنان هر چاریارءَ

هما  صدیق اکبر یارءِ غارءَ

عمر فاروقءُ  عثمان مالدارءَ

علیءِ مرتضی  دُلدُل سوارءَ


تَهارین زُمپ شَپان راهان من گاران

نَبان  گار  راهی  اِستاران  بِچاران

رسولُ الله هی  اصحابانءُ  یاران

اَگان  آیانی  رَهبندان  بِداران

دُروتان دیم دیان په تابعینءَ

په  تبع  تابعینءُ  عابدینءَ

رسولی  اهلبیت  اُم البنینءَ

په بی بی عایشه مات مومنینءَ

چه پیشی دُورگُشان من گُپتءُ گالان

بلوچستانی  رسمءُ دُودءُ هالان

چه زِگری بوتگین مردانءُ زالان

شُت اَنت پیرانی پَتّرماهءُسالان

هَما  مَردین مَڈادار مَرد  الله

که بوتَگ نامی واجه عبدِ  الله

هَما مرد که وتی جاگه مَه هِند کُت

دِیُوبَندی دَوارءُ جَه مِنِند کُت

گون نِیکین عالمانی گِندءُ نِند کُت

دِگه مُلک مردمانی هَنچوجِند کُت

دُراهین راجی یَکّین رَندءُرِند کُت

رسولی  سُنّتانءَ  بُرزءُ زِند کُت

عزیزین زَهگءُبَچّانی په وانَگ

تیاربوتنت په وازءُزانتءُزانَگ

هَمُک هَلکان شریعت شِنگءُتالان

زَکاتان داتَگِش میراثءُ مالان

گریوان بوت  گُنَهکار آهءُ  نالان

پُرُشت شیطانی بانزُل باسکءُبالان

کماشءُ اِسپی ریش هَلکانی سردار

مه دُزابی دَمَگ  شهردارءُ  زَردار

پِتءُ چُکّ  زالکین ماتانی  کِردار

هَمُک ناسَرپَدءُ  چه  دینءَ  بیزار

رَسِت مردءِ که دیندارءُ عزیزاَت

گون پاکین پاگی پَلگارءُ تمیزاَت

هَما که پاد مه منبر پُشت میزاَت

مئی  رَهدَربرءُ  عبدالعزیزاَت

کُتی بُنگیج  وتی  وازءُ بیانءَ

نُمازءُ روچَگءُ وانَگ کُرانءَ

کُتی حافظ  هَما سِلّین  بَدانءَ

پَدا  بُنداتی  بَستَگ  مَسجدانءَ

هَما که اهلسنت گُشت سَروگ اِنت

دلءِ رنجانءُ  دَردانی بَروگ اِنت

مه هرجمعه مئی روچان اَعیداِنت

گُشءِهَنچوش که مئی عیدءِسعیداِنت

مئی  اسلامی شیخ  عبدالحمیداِنت

گپءُگالی چه کُرانءِ مجیداِنت

شما هم  شیخءِ اسلام مُسلمین ءِ

سَروگءِ  سُنّیانءُ  مومنینءِ

مئئ  رَهدَربرءُ  دائم  تلاشءِ

په دُژمن هَنچوتیرانی کلاشءِ

مئی رَهشونءُراجی رهبرءِ تو

مئی نیگراهی ساهءُ سرورءِ تو

دعاءِ خیر بلوٹ عبدالسلام تو

مَکَن گیش گالءُگپتارءُکلام تو

 

زاهدان 20/5/1392 عبدالسلام بزرگ زاده

[ یکشنبه ۸ دی ۱۳٩٢ ] [ ٩:۳٥ ‎ب.ظ ] [ عادل قنبرزهی ]
.: Weblog Themes By Iran Skin :.

درباره وبلاگ

امکانات وب
قرآن آنلاین

,,

اسما خداوند متعال